ليالي الكوافير 1

 -1-

من عشر سنين فاتوا .. على لسان مي

محمد اخويا اصلا كان بيدرس ف الأزهر، انا عارفة ان الشغل بتاعه حرام، بس هيعمل ايه ده اكل عيشة، هو خريجكلية علوم و حاول يشتغل معرفشي ..

البنت هند اللي كانت شغالة معانا، فاكراها؟ مرتين تلانه حاولت تمد ايدها على لامؤاخذة يعني، بعدين عشان يفكه منها قاللها ماشي نبقى نتخطب بعد سنة يعني، اصلا هند كانت تعرف اتنين و هيا معاه و كنت بسمعها بتكلمهم بس محمد طاوعها عشان المحل يعني، بعد كدة بقى جابت ابوها و قال ايه عاوزة شبكة و خطوبة، بس محمد سب الملة لأبوها، قال له انا مش هفضحلك بنتك دي بتمشي مع مسيحيين اصلا، دي لما كانت بتجيلها البيريود الشارع كلة بيبقى عارف يا راجل يا دون .. بس هند مخطوبة دلوقت عشان كدة احنا نسينا يعني ..

**

-2-

في الكوافير مع مي..

مي: لعلمك انتي اتفضحتي في الشارع..
* انا ولا يهمني،
مي:  يا ناقصة انا لو مكانك اعزّل ..
مي بقى حبت تحكي الحكاية للزباين، ان "اسماء" كانت ماشية مع ولدين في نفس الوقت، و في واحد فيهم عشان يثبّتها قالها هقرا فتحتك، و قرا فتحتها فقالت ماشي، لما التاني عرف قال له دي مُلعب و لسة بتكلمني و هثبتلك..اتصل بيها و هو فاتح السبيكر و قالها اسماء و حشتيني، قالت له و انت كمان، قالها قولي لي .. الأندر وير بتاعك لونه ايه .. رقعت ضحكة سمّعت الشارع و قالت له احمر و المكالمة كملت شوية و قفل عشان التاني يتصل..راح اللي قاري فتحتها اتصل و قال لها ان الأولاني بيقول انه لسة بيكلمها، قالت له احلف لك ع المصحف لأ .. قالها طيب سيبك، قولي لي، لابسة اندر وير لونه ايه .. قالت له احمر .. قالها احمر يا شر**** زي ما قلتي لأحمد، قالت له ده كداب و هو مسجل لي المكالمة دي من زمان .. قال لها انا كنت قاعد و سامع .. قالت له اصلا انا مش لابسة اندر وير احمر ..

**

البنتين كانوا قاعدين، هي مصممة تعمل وشها عشان هتقابل صاحبها، و هي اصلا لابسة نقاب، ففي زبونة تانية قالت لها و انتي بتقلعي النقاب في الشارع، قالت لها اه عادي اصل انا بلبس النقاب عشان محمود، فـ و انا معاه هو مبيتضايقش ..

فراحت مي اول ما الزبونة وقعت تحت اديها، قالت لها، دي اصلا بت عرة و مشيت مع اربعة قبله و في واحد فيهم جرسها في شارعهم و قال انها راحت له البيت و كان معاه اتنين من اصحابة، بس الناس ضربته عشان هي منقبة اصلا.

**

محمد اصلا يا بنتي كان نفسة يتجوز واحدة جارتنا مسيحية، بس اصلا احنا مش بتوع اذيّة، عندنا المسلمين و اولهم ستي هتقولك تخليها تسلم، مع انه يجوز على دينها بس انا عارفة و بقولك اهو احنا نحب نستجبر، و بعدين ابوها صاحب ابويا و منرضاش نجرسه، بصي اصل هيا مش جرسة لينا بس جرسة ليكوا.

لعلمك البنات المسيحيات مُزز جدا، ياأما وحشين و شبه البوم و الواحدة تيجي تكلمنا من مناخيرها كدة .. بس انا صدقيني بحبكم جدا، اصلا انا عارفة كتير م الدين عشان انا بدرس تاريخ ف الجامعة..

**

محمد خطب نانسي اللي جت تشتغل جديد، لا والله بجد بنت مجدع و متربية، و ميتخافش عليها، اصل بصي انتي بتبقي عارفة مين اصلا البنت اللي يتحاول معاها، و محمد كدة كدة شكله حبها فـ و الله حتى لو خلف منها قبل ما يتجوزوا، هيتجوزها برضيك .. ما انتي عارفة محمد مش ندل يعني بس هو ميعملهاش من اول.

**

مي: يا شيشي انتي انتخبتي مين، لعلمك انا انتخبت الأخوان، و افرحي يا نانسي اهم رقعونا على قفانا، اصلا النتيجة المتعلقة دي بتاعتهم، لأ و محمد نزل قال يراقب، اه و قالوله عشان دقنك و انتي عارفة محمد مربيها عشان البنات و عشان شكله بيها مُز، بس احنا لعلمك انتخبناهم عشان معرفناش حد تاني يعني و بعدين كانوا يدبحونا ف الجامع اللي قصادنا، ده احنا كانت العمارة يجيبوها واطيها عاليها، ايوة فاكرة لما كنتي تهزري مع محمد خصوص الجامع .. بتاع نسائهم حلالون لنا ...  بس هو المستوصف اصلا و خلاص، لا حلالون ولا حرامون جاتهم نيلة بقر و بيشوهوا الدين ..

**

مروة لسة مخلفتشي وداخلة ع التلاتين، و لسة جوزها مخفش م الحادثة، ربنا مسبب الأسباب هو كان هيشتغل محامي، بس ابوه صمم ع شغلانة الحكومة، لو كان اتكسح الكسحة دي كان المحامي طرده، الحكومة سايباه ..

اوعي يغرك انه بيت عيلة و بيحترومنا، ابدا .. كلهم بينبطوا بالكلام على مروة عشان الخلفة عشان كمان خالتي ام علي مروة اللي وقفتلها اما كانت عاوزة تاخد المحل، فتلاقيها شمتانة، سَو.