ليالي الكوافير 4

الخلفاوي – روض الفرج.

احذية المُصلين، وشاب وفتاة بجانب الجامع يلتقطون اخر كلمتين في اللقاء .. "أبقي ردي عشان مبهدلكيش" ..

-هاتي يا بنتي الشنطة، ماهو طول ما المترو زحمة محناش طايقين بعض، طول ماهو فاضي بردوا محناش طايقيين بعض، انا اصلي احب اريح الناس لأني هييجي يوم وحد يريحني، وانا ست كبيرة ورجلي بتوجعني، والشابات الصغيرين اللي زيك مبيرحموش ومبيحسوش بحد احياناً.

-انا اصلا مقلعتش الحجاب غير لما اتأكدت اني ايماني مش واقف عليه، وبعدين كل واحد بيشيل وزر نفسه، يعني لو لبسته او قلعته انا اللي هتحاسب مش حد تاني، بس طيب عشان اللي جنبك.

حد عاوز تلات مفارش تلاجة هنا بلاستيك بيتيني ومبيسحش!

بت يا إسراء، ابوكي فاضح الدنيا بيدور عليكي، وجه عندنا.

خليه ملكيش فيه .. واستني بقى لغاية ما اخلص انا لسة طالعة.

رمسيس - غمرة

معلش يا حسين، انا عارفة انك قايل متتصليش، بس ابو مُسعد هيطردنا من الشقة وانا مش عارفة اعمل ايه، ورحمة ابوك ادفع له لغاية ما شكري يرجع وهيدلك اللي انت عاوزه .. ورحمة ابوك ما تحوجني كدة.

عند مَي..

تعالي هنا يا بنت في حضني وارقعي ضحكة لخريت الشاطر اللي قالك منعيدش عليكم، طيب لو كان الواد محمد اتجوز جارتنا اللي بيحبها، كان هيقولها لامؤاخذة مش ناوي اعيد عليكي عشان خيرت واقف على باب الجنة بيعد!! ..

 انتي فكرك يعني هما بدستورهم بزبالتهم دول هيأثروا فينا، ده حتى الجامع اللي برة ع الشارع – مش جامع السُنيّة لأ التاني – بيبهدلهم في الخطبة، اه خلاص الشعب وِعي وعِقل..

****

عارفة والله، هي بس تبان كدة قرشانة، لكن هيا طيبة .. دي حتى يا عيني جوزها مغلبها والناس بتيجي عليها وكلامهم بيضايقها، مرة ياعيني كانت بتشتكي لأمي انه بيهجرها في الفراش لما تطبخ اكل مش على كيفه.

وانتي يعني تفتكري الستات مبيحبوش يناموا مع الرجالة؟ هو في ستات كدة الهم خدها وبقت باردة، لعلمك بردوا حتى اللي لامؤاخذة اتطاهرت وهي صغيرة، ميضرش بردوا. أنا اصلي كمان مرة سمعت ف التلفيزيون ان الإثارة الجنسية دي في الدماغ، يعني اللي طايقة جوزها وعاوزة تنام معاه، لامؤاخذة هتحس بإثارة، واللي جافياه، ولا هتبص له لو عندها اجدع ** في الدنيا .. يعني الناس مبتسلاش الحشيش ليه؟؟ عشان كيفه، مش عشان مثلا بيدمنوه .. بردوا الرجالة كيف، وبعدين ما يعرف فأفأة الصوابع، أد من فرد الحلاوة، و البحر يحب الزوادة، طول ماهو مالح..

****

مرة جت عندنا زبونة، وكان يا عيني جسمها كله وارم، وكانت كمان عاوزة بقى تعمل ايديها ورجليها بالشمع، فأنا مرضيتش عشان ايديها هتورم أكتر، انا مرضيتش اسألها يعني هي ايه اللي عامل فيها كدة، بس هي اللي قالت بشوقها، قال يا ستي جوزها بيهريها ضرب و بيعذبها اصلا كمان، ويا حبة عيني كانت بتعيط وهي بتحكي .. بس الولية الهبلة بقى، بتعمل ايديها علشان هو راجع من السفر و عشان ميديهاش علقة تاينة ..

انا بقى هزأتها الحقيقة، وقولت لها اللي متحترمش نفسها جوزها يبهدلها، ما تهجره في البتاع الفراش دي زي ما بيعملوا، إشمعنى هما .. الا صحيح هيا اهجروهم في الفراش دي في الدين؟ ايه ياربي هدم اللذات ده؟ الا تعرفي، انا مشفتش واحدة عندها جبروت متعملش ايديها زيك كدة .. بس جدعة، ولا ده عند المسيحيين اصلا حرام؟

****

تعرفي يا شيشي، من كام يوم كدة جاتلنا زبونة كانت زبونتنا زمان وفجأة اختفت، جات كدة وكانت هيئتها متغيرة خالص، وبالصدفة وهيا داخلة دخلت وراها واحدة زبونة عارفينها يعني، والله انا مكنتش هفتكرها لولا الزبونة التاينة سلمت عليها، عرفنا بقى يا ستي انها كبرت صدرها وشدت وشها وعملت زرع شعر معرفش بكام واتجوزت واحد امريكاني شغال هنا، وقعت عليه فين يا بنتي ولا بصلها على ايه، متعرفيش .. الأكادة بقى انها يعني كانت متطلقة مرتين قبل كدة وعندها عيال شحوطة طولها والراجل صورته، سبحان الخالق يحل من على حبل المشنقة  .. لأ والغريب ان الست خلفت عيل من سنة وطبعا هي والعيل بقوا أمريكان .. يالا حظوظ ..
انتي متتجوزيش واحد مصري، دول ولاد كلب اصلا. انا يعني محبش اتجوز واحد امركياني ولا حاجة، بس هما الصراحة حلوين وريحتهم حلوة ومش معفنين زي المصريين بردوا .. وتلاقي الراجل من دول يجري ورا الستات الأجانب اكنه عِدل اوي، او اكن احنا ياللي بنمرش نفسنا في الحموم معفنيين وهما اللي حتى مبيحطوش شَبّة تحت بطاطتهم نضاف اوي .. اسفوخص.

****

فاكرة جارتنا ام تامر اللي كانت بتنزل تصبغ لما يكون الدنيا زحمة، اه الست العجلة دي، اهي دي يا ستي كان عندها بنت دلوقتي عمرها 16 سنة، الست حجبت البنت من وهي 12 سنة، من اول ما خلصت ابتدائي وبعدين بقى بقت تقعّد البت معاها في كل حتة، البت بقت شبه النسوان المتطلقين كدة، بتتكلم في كل حاجة واي حاجة، المهم يا ستي ع العيد الكبير رحنا لقينا الست الناقصة وافقت على خطوبة البت، ونقولها البت عندها 16 سنة وامي وابويا نزلوا لها .. حتى نزلوا لها محمد يقولها سيبك من كلام الشيوخ ولاد الكلب دول دي عيلة، والست بردوا اللي راكب راسها تجوز البت .. والبت اتخطبت اد شهر والولية اخدت مهر وشبكة اد كدة وغيرت عفش الشقة وجابوا عربية، كل ده عشان اللي اتجوزها شيخ عربي .. هي البت فايرة وحلوة، بس لامؤاخذة ماهو بالفلوس دي يقدر يجيب ايتها واحدة .. الا هو يا شيشي مش في سن جواز قانوني ولا ايه؟ ولا 16 قانوني؟ والله ما انا عارفة.

****

الإسبوع اللي فات كنت في المترو، كنا راجعين متأخر اوي، وكان معايا محمد، المهم يا ستي دخلنا عربية ومكانش فيها غير خمسة ستة ولقينالك واحد قاعد في وشنا عمالك يكتب في شتايم ع الحتة اللي جنب الباب دي، أكيد شفتي حاجات منها اصل شكلها عملية كبيرة يعني، كاسيات عاريات في النار، وانا كان شعري اصلا باين م التحجيبة بقى وكنت نايمة على كتف محمد. محمد راح يقول له يا سيدنا الكلام ده مش هنا، انت كدة بتبوظ المترو، ويالهووووي، ده اتفتح بقى، وانت مالك انت ومين اللي معاك دي اصلا، وانت ايه دخلك .. وراح محمد بقى مسكتلهوش، ومسكوا في خناق بعض، محمد كان هيجيب وشه بالمطواه لولا الناس ع الرصيف حاشوا بينهم لما المترو وقف، بس مكانش فيه عسكري، اصل محمد كان ناوي يوديه القسم ونشوف بقى، اصل متنسيش بردوا محمد بدقن ..

****

مش البت سهام مرات ابن عم جوز مروة قفشوها مع راجل، هما يعني مقفشوهاش بتعمل حاجة غلط، بس كانت قاعدة معاه في جونينة كدة، اصل هو بردوا الواد جوزها وسخ اوي وبيطلب منها حاجات مش ولابد، هو اللي انا سمعته كمان انه صورها وفرجها لصحابه وان الجدع اللي شافوها معاه ده اصلا شاف الفيديو وكان صاحب جوزها، هي كانت بتقول لمروة انه معندهاش مانع تعمل له طلباته السيكوسيكو، بس هو كمان كان بياخد فلوسها وبيضربها ومكانش بيوديها بيت ابوها ابدا تزورهم. هي راحت قالت انها قابلت الجدع ده صدفة وان جزمتها اتقطعت فقالوا يقعدوا شوية، الحقيقة في واحدة اعرفها بتقول انها قابلتها اليوم ده وقالت لها ان جزمتها مقطوعة وكانت هتعبتها تجيب لها واحدة، بس انتي عارفة بقى الناس تحب تصدق الكلام الوحش، انا كنت فاكرة الواد عاوز يطلقها لما فضحها كدة، بس مطلقاش، هو غالبا كيفه في ضربها.

****

البنت نانسي سقَّطت مرتين لغاية دلوقتي، اصلا مرة منهم هي اللي سقَّطت شوقها عشان قال ايه هي لسة صغيرة وعشان كانت عاوزة محمد يكتب لها المحل، محل ايه اللي يكتبهولها وهو ايجار اصلا؟ وبعدين البت بتتعوج عليه جدا ومحمد بيقوم سايبلها البيت ونازل تقوم هيا تنكاد اوي بقى وتعمل خناقات مع البيت كله، مرة معانا ومرة مع خالتي ام علي، المهم تنكد عليه وتخليه يرجع. بس المرة اللي عرف انها سقطت فيها لطشها بالقلم، بس هو خايب، راح راجع بعد كدة اتاسف لها واتصلحوا، لو مكانش ضربها كان عرف يربيها بالذوق، كان هيبعتها بيت ابوها بس هو مد ايده عليها.

البت اصلا فوضاحية اوي، كل لامؤاخذة ما يعملوا حاجة تصرخ وتسمع الناس، هو بُصي كل واحد براحتة بس البيوت هنا لازقة في بعضيها والناس بتسمع، بس والله يا بنتي الناس هي اللي مش سايبة حد في حاله، ما اللي يسمع يسمع واللي يصوت يصوت، الغيران يروح يصوت.. وبردوا مروة لسة مخلفتش، البت دي مش مكتوب لها حَبَل ..

****

الولية الناقصة اللي جبناها تشتغل شوية هنا بعد ما نانسي حملت الحمل التاني، عندها بنت عيلة والست كانت عاوزة تطاهرها، الست عايشة في القاهرة ومتعلمة، يعني ولا جاهلة ولا اي حجج م اللي بيقولوها في التلفيزيون، وشغالة كوافيرة ومبتركعهاش، عاوزة تشوه البت بقى ليه متفهميش؟ الولية محمد كلمها وقالها ميصحش تعملي كدة ومعرفش ايه وهيا على كلمة واحدة ستها اللي عاوزة، والولية ستها بنت الكلاب دي مالها؟ الستات بقى فعلا ناقصات عقل، الواحدة فيهم عشان تتلدع على قفاها لازم باقي الستات يتلدعوا زيها، بس بردوا لا انا ولا محمد سبناها، محمد قال لها هروح ابلغ فيكي، لولا كدة لولا ما ارتجعت، او هي بتقول انها ارتجعت .. الله اعلم، الله يرحم البت من ايديها. الا انتوا مبيطاهروكوش؟ هو مش حلال عندكوا؟

****

عارفة الزبونة اللي كانت بتيجي لابسة هدوم عريانة اوي دي، اللي عيونها خضر وجمالها فلاحيني كدة، اه شيريهان .. اهي الزبونة دي يا ستي متهمين اخوها في عيل يا عيني صغير انه هتك عرضه، وبيقولوا اهل الواد كانوا هيدبحوه لولا اللي ماسك الدايرة بردوا جه لم الموضوع ودفعه عشرين الف جنيه. ابن الكلب ده معاه عشرين الف جنيه منين متفهميش. اصل بردوا مش بس الشيوخ الأوساخ هنا اللي ليهم في العيال، لأ الشعب فيه ناس ولاد زواني على فكرة .. تحسي الناس دي لازم يشنوقوها، انا رحت سلطت محمد يقولهم يبلغوا عنه، بس اهل الواد عزّلوا مع انهم خدوا الفلوس .. الشعب ابن كلب ونجس اوي، الناس كانت بتحكي الموضوع وفي منهم بيتريقوا، رجالة معدومة النخوة .. هيلاقوه في عيالهم انشاء الله .. بس تفتكري الواد عامل ايه يا جيجي ؟؟!!!